Emily噚日去咗每年一度嘅環保大獎頒典禮,勇奪大獎嘅係利奧紙品集團,佢地喺鶴山開設廠房,自己成立委員會,研究點樣慳電、慳柴油,結果設計咗唔少別出心裁嘅裝置,例如一般冷氣機要用特別設備降溫,利奧廠房就調番轉,收集冷氣機熱源,用番嚟煲水供員工或宿舍用,每年柴油用量減少3.9萬公升。廠房仲安裝咗一個中央真空泵系統,以前每架機器都要用一個泵,依家中央處理,每年慳番成百萬度電,耗電量減少76%,電費都減少咗成百萬。利奧營運董事梁仲明話,本來只係諗住設計環保裝置,減少浪費,點知原來回報咁大,慳番電費柴油,唔使一年就收回投資機器成本,佢鼓勵其他同行都咁做,有利日後發展咁話。港鐵回收82噸充電池獲獎除咗利奧之外,港鐵亦得到環保獎。港鐵有限公司技術及工程事務總經理梁泉材指,去年港鐵喺東涌線鋪設隔音屏障,成功減少噪音;而06年起亦與環保署合作,將共82噸充電池回收。又環保又慳錢,Emily覺得一舉兩得,值得大力推廣。